नेपालीनेपाली
बहिरा महासंघ नेपालको आयोजना तथा नेपाल पर्यटन बोर्ड र संयुक्त राष्ट्रसंघीय विकास कार्यक्रम नेपालको सहकार्यमा २० जना बहिरा युवालाई लक्षित गरि एक महिने बारिस्टा तालिम टिन टंङ क्याफे एन्ड ट्रेनिङ सेन्टर जमल, काठमाडौंमा मिति २०८३ भाद्र ८ गते सम्पन्न भएको छ । तालिमको मुख्य उद्देश्य बहिरा व्यक्तिहरूको व्यावसायिक सीप विकास, स्वरोजगारका अवसर सिर्जना गर्नुका साथै पर्यटन तथा आतिथ्य क्षेत्रमा उनीहरूको समावेशी सहभागिता अभिवृद्धि गर्नु रहेको छ । महासंघका अध्यक्ष सन्तोष के.सी.को सभापतित्व तथा दिगो पर्यटन परियोजनाका परियोजना व्यवस्थापक धर्मराज दवाडीको प्रमुख आतिथ्यतामा सम्पन्न भएको थियो । तालिममा सहभागीहरूलाई कफी तथा अन्य पेय पदार्थ तयार गर्ने, कफी मेसिन तथा उपकरणको प्रयोग, सरसफाइ तथा स्वच्छता, ग्राहक सेवा र कार्यस्थलमा आवश्यक व्यावसायिक व्यवहारलगायतका विषयमा सैद्धान्तिक तथा प्रयोगात्मक ज्ञान प्रदान गरिने भएको छ । उद्घाटन समारोहमा टिन टंङ क्याफे एन्ड ट्रेनिङ सेन्टरका सञ्चालक विजय कटवालले आफूहरूले विगत १२ वर्षदेखि बारिस्टा तालिम सञ्चालन गर्दै आएको उल्लेख गर्दै बहिरा युवालाई तालिम दिन पाउँदा खुसी व्यक्त गरेका थिए । दिगो पर्यटन परियोजनाका परियोजना व्यवस्थापक धर्मराज दवाडीले होटेल तथा रेस्टुरेन्ट क्षेत्रमा महिला र अपाङ्गता भएका व्यक्तिको सहभागिता न्यून रहेकाले सीमान्तकृत वर्ग र समुदायको सहभागिता बढाउने उद्देश्यले परियोजनाले काम गरिरहेको र होटेल रेस्टुरेन्टमा सिमान्तकृत समुदाय, महिला र अपाङ्गता भएका व्यक्तिको रोजगारमा सहभागिता एकदमै न्यून रहेको बताउनुभएको थियो ।
राष्ट्रिय बहिरा महासङ्घ नेपालका अध्यक्ष सन्तोष केसीले बहिरा युवालाई लक्षित गरेर दिगो पर्यटन र उद्यमशीलतालाई समावेशी बनाउने प्रयास स्वरूप तालिम आयोजना गरिएको र सहभागीलाई तालिमलाई केवल प्रमाणपत्र प्राप्त गर्ने माध्यमका रूपमा नलिई जीवन परिवर्तन गर्ने अवसरका रूपमा उपयोग गर्न बताउनुभएको थियो । तालिमपछि सहभागीहरूलाई होटल, क्याफे, बेकरी तथा पर्यटन क्षेत्रमा रोजगारी वा स्वरोजगारका अवसरसँग जोड्दै आर्थिक आत्मनिर्भरता र सामाजिक सम्मान अभिवृद्धि गर्ने लक्ष्य राखिएको छ ।
